യുഡിഎഫ് സർക്കാരിന് മുന്നിൽ ഏറ്റവും വലിയ വെല്ലുവിളി നിലവിലുള്ള ഉദ്യോഗസ്ഥർ സഹകരിക്കുന്നില്ല എന്നുള്ളതാണ് ..

സർക്കാർ മാറിയാലും ഭരണസംവിധാനം മാറുമോ? ഉദ്യോഗസ്ഥർ ഏതുതരത്തിൽ ഗവൺമെന്റിനോട് സഹകരിക്കും..

യുഡിഎഫ് സർക്കാരിന്റെ മുന്നിലെ ഏറ്റവും വലിയ വെല്ലുവിളി എന്ത്?

കേരളത്തിൽ രാഷ്ട്രീയ മാറ്റങ്ങൾ സംഭവിക്കുമ്പോഴെല്ലാം ജനങ്ങൾ വലിയ പ്രതീക്ഷകളോടെയാണ് പുതിയ സർക്കാരിനെ നോക്കിക്കാണുന്നത്. തിരഞ്ഞെടുപ്പിൽ വിജയിച്ചവർ പുതിയ നയങ്ങളും വികസന വാഗ്ദാനങ്ങളും മുന്നോട്ട് വെക്കുന്നു. എന്നാൽ യഥാർത്ഥ ചോദ്യമെന്നാൽ — ആ തീരുമാനങ്ങൾ ജനങ്ങളിലേക്ക് എത്തിക്കുന്നത് ആര്? അതിനുള്ള ഭരണസംവിധാനം എത്രത്തോളം സർക്കാരിനൊപ്പം പ്രവർത്തിക്കും? ഇനി കേരളം ഉറ്റു നോക്കുന്നത് സർക്കാർ ഇവരെ എങ്ങനെ ഹാൻഡിൽ ചെയ്യും എന്നുള്ളതാണ്.

ഇപ്പോൾ സംസ്ഥാന രാഷ്ട്രീയത്തിൽ തുറന്ന് അധികം ചർച്ച ചെയ്യാത്ത ഒരു വലിയ വിഷയമാണ് ഇത്. സർക്കാർ മാറിയാലും ഭരണസംവിധാനത്തിനുള്ളിലെ ചിന്താഗതിയും സ്വാധീനവുമോ മാറുന്നത്? പ്രത്യേകിച്ച് വർഷങ്ങളായി വിവിധ വകുപ്പുകളിൽ പ്രവർത്തിച്ചുവരുന്ന ഉദ്യോഗസ്ഥരിൽ പലർക്കും വ്യക്തമായ രാഷ്ട്രീയ അനുകൂലതകളുണ്ടെന്ന വിമർശനം സമൂഹത്തിൽ ശക്തമാണ്.

ഭരണകൂടത്തിനുള്ളിലെ രാഷ്ട്രീയ സ്വാധീനം

കേരളത്തിലെ എൻജിഒ യൂണിയനുകൾ വർഷങ്ങളായി ശക്തമായ രാഷ്ട്രീയ സ്വാധീനമുള്ള സംഘടനകളായി മാറിയിട്ടുണ്ട്. പ്രത്യേകിച്ച് ഇടതുപക്ഷ അനുകൂല സംഘടനകൾക്ക് സർക്കാർ വകുപ്പുകളിൽ വലിയ പിടിയുണ്ടെന്നത് രാഷ്ട്രീയ വേദികളിൽ പലപ്പോഴും ഉയരുന്ന ആരോപണമാണ്.

ഇതുകൊണ്ടുതന്നെ പുതിയ സർക്കാരിന്റെ നയങ്ങൾ നടപ്പിലാക്കുമ്പോൾ അകത്തളങ്ങളിൽ നിന്ന് തന്നെ പ്രതിരോധം ഉണ്ടാകുമോ എന്ന ആശങ്ക ഉയരുന്നു. സർക്കാർ പ്രഖ്യാപിക്കുന്ന പദ്ധതികൾ ഫയലുകളിൽ കുടുങ്ങി നിൽക്കുന്നതും, നടപടികൾ അനാവശ്യമായി വൈകുന്നതും സാധാരണ ജനങ്ങൾക്ക് പോലും ഇപ്പോൾ വ്യക്തമായി കാണാൻ കഴിയുന്ന കാര്യങ്ങളാണ്. ഉദ്യോഗസ്ഥർ ജനങ്ങൾക്ക് വേണ്ടി ജോലി ചെയ്തില്ല എന്നുണ്ടെങ്കിൽ ജനങ്ങൾ സർക്കാരിനെ വെറുത്തു തുടങ്ങും.

സർക്കാരിന്റെ യഥാർത്ഥ പരീക്ഷണം  ഉദ്യോഗസ്ഥരെ നിലയ്ക്ക് നിർത്തുക എന്നുള്ളതാണ്...

ഒരു സർക്കാർ തിരഞ്ഞെടുപ്പിൽ വിജയിക്കുക എന്നത് ഒരു ഘട്ടം മാത്രമാണ്. എന്നാൽ ഭരണസംവിധാനത്തെ കാര്യക്ഷമമാക്കുക എന്നതാണ് ഏറ്റവും വലിയ വെല്ലുവിളി ഉദ്യോഗസ്ഥരുടെ സഹകരണം ഇല്ലാതെ നടത്താൻ കഴിയില്ല.

മന്ത്രിമാർക്ക് എല്ലാ ഓഫീസുകളിലും നേരിട്ട് ഇടപെടാൻ കഴിയില്ല. ഓരോ ഫയലും വ്യക്തിപരമായി പരിശോധിക്കാനും സാധിക്കില്ല. സർക്കാർ നയങ്ങൾ നടപ്പിലാക്കേണ്ടത് ഉദ്യോഗസ്ഥരാണ്. അവിടെ നിഷ്ക്രിയത്വമോ രാഷ്ട്രീയ വിരോധമോ ഉണ്ടെങ്കിൽ മികച്ച നയങ്ങൾ പോലും പരാജയപ്പെടും.

ഇതുതന്നെയാണ് ഇപ്പോൾ യുഡിഎഫ് സർക്കാരിന്റെ മുന്നിലുള്ള ഏറ്റവും വലിയ വെല്ലുവിളിയെന്ന് പലരും വിലയിരുത്തുന്നത്.

ആരോഗ്യവകുപ്പിൽ തുടങ്ങുന്ന സംഘർഷസൂചനകൾ

ഇപ്പോൾ തന്നെ ചില വകുപ്പുകളിൽ, പ്രത്യേകിച്ച് ആരോഗ്യവകുപ്പിൽ, പഴയ ഭരണത്തെ മഹത്വവത്കരിക്കുന്ന തരത്തിലുള്ള രാഷ്ട്രീയ പ്രതികരണങ്ങൾ ശക്തമാകുന്നതായി കാണാം. പരാജയപ്പെട്ട മുൻ മന്ത്രിമാർ പോലും ഇപ്പോഴും മാധ്യമങ്ങളിൽ സജീവമായി രംഗത്തെത്തി പഴയ ഭരണമാണ് മികച്ചതായിരുന്നുവെന്ന സന്ദേശം നൽകാൻ ശ്രമിക്കുന്നു.

ഇത് സാധാരണ രാഷ്ട്രീയ വിമർശനമായി മാത്രം കാണാനാകില്ല. പുതിയ സർക്കാരിന്റെ വിശ്വാസ്യതയെ ചോദ്യം ചെയ്യാനും ജനങ്ങളിൽ ആശയക്കുഴപ്പം സൃഷ്ടിക്കാനും ഉള്ള ശ്രമമായും ചിലർ ഇതിനെ കാണുന്നു.

സർക്കാർ നയങ്ങൾ പരാജയപ്പെടുന്നത് എന്തുകൊണ്ട്?

പലപ്പോഴും ജനങ്ങൾ ഒരു സർക്കാരിനെ കുറ്റപ്പെടുത്തുമ്പോൾ യഥാർത്ഥ തടസം എവിടെയാണെന്ന് പരിശോധിക്കാറില്ല. ചിലപ്പോൾ പ്രശ്നം മന്ത്രിമാരുടെ ഭാഗത്തല്ല; ആ തീരുമാനങ്ങൾ നടപ്പിലാക്കുന്ന ഭരണസംവിധാനത്തിലായിരിക്കും.

ഫയലുകൾ നീങ്ങാത്തത് എന്തുകൊണ്ട്?
തീരുമാനങ്ങൾ വൈകുന്നത് ആരുടെ ഉത്തരവാദിത്വമാണ്?
ജനസേവനത്തിൽ വീഴ്ച വരുമ്പോൾ ഉത്തരവാദി ആരാണ്?

ഇത്തരം ചോദ്യങ്ങൾ കൂടുതൽ ശക്തമായി ഉയരേണ്ട സമയമാണിത്.

ജനങ്ങളുടെ നികുതിപ്പണത്തിൽ പ്രവർത്തിക്കുന്ന സംവിധാനം

സർക്കാർ ഉദ്യോഗസ്ഥർ ജനങ്ങളുടെ നികുതിപ്പണത്തിലാണ് ശമ്പളം വാങ്ങുന്നത്. അതുകൊണ്ട് തന്നെ ജനങ്ങൾക്ക് മുന്നിൽ ഉത്തരവാദിത്വം ഉറപ്പാക്കേണ്ടത് അനിവാര്യമാണ്.

തീർച്ചയായും ആത്മാർത്ഥമായി ജോലി ചെയ്യുന്ന നിരവധി ഉദ്യോഗസ്ഥർ കേരളത്തിലുണ്ട്. എന്നാൽ ചെറിയൊരു വിഭാഗത്തിന്റെ അനാസ്ഥ പോലും മുഴുവൻ ഭരണസംവിധാനത്തിന്റെ വിശ്വാസ്യത തകർക്കാൻ മതിയാകും. എല്ലാ ഉദ്യോഗസ്ഥരെയും അടച്ചാക്ഷേപിക്കുകയല്ല.

ജനങ്ങൾക്ക് വേണ്ടിയല്ല, രാഷ്ട്രീയം മുൻനിർത്തിയാണ് ചിലർ പ്രവർത്തിക്കുന്നതെന്ന പൊതുധാരണ വളരുന്നത് ജനാധിപത്യത്തിനുതന്നെ അപകടകരമാണ്.

മാധ്യമങ്ങളുടെ ഉത്തരവാദിത്വം

ഇവിടെ മാധ്യമങ്ങൾക്കും വലിയ പങ്കുണ്ട്. രാഷ്ട്രീയ വിവാദങ്ങൾക്കും ഇക്കിളി വാർത്തകൾക്കും മാത്രം പ്രാധാന്യം നൽകാതെ സർക്കാർ നയങ്ങൾ എന്തുകൊണ്ട് നടപ്പിലാകുന്നില്ലെന്ന് അന്വേഷിക്കേണ്ട ഉത്തരവാദിത്വം മാധ്യമങ്ങൾ ഏറ്റെടുക്കണം.

ഒരു പദ്ധതി വൈകിയാൽ അതിന് ഉത്തരവാദി ആര്?
ജനങ്ങൾക്ക് ലഭിക്കേണ്ട സേവനങ്ങൾ തടസ്സപ്പെടുന്നത് എന്തുകൊണ്ട്?
ഭരണസംവിധാനത്തിനുള്ളിലെ രാഷ്ട്രീയ സ്വാധീനം എത്രത്തോളം?

ഇവയെക്കുറിച്ച് സമൂഹം തുറന്ന് ചർച്ച ചെയ്യേണ്ട സമയമാണിത്.

ഒരു സർക്കാരിന്റെ വിജയം മന്ത്രിമാരുടെ കഴിവിൽ മാത്രം ആശ്രയിക്കുന്നതല്ല. ആത്മാർത്ഥമായി പ്രവർത്തിക്കുന്ന ഭരണസംവിധാനവും അത്ര തന്നെ പ്രധാനമാണ്.

ജനങ്ങളുടെ ക്ഷേമം മുൻനിർത്തി പ്രവർത്തിക്കുന്ന ഉദ്യോഗസ്ഥസംഘം ഇല്ലെങ്കിൽ ഏതൊരു സർക്കാരിനും ദീർഘകാല വിജയം നേടാൻ കഴിയില്ല. രാഷ്ട്രീയ ചായമല്ല, ജനസേവന മനോഭാവമാണ് ഒരു ഉദ്യോഗസ്ഥന്റെ ഏറ്റവും വലിയ ഉത്തരവാദിത്വം.

കേരള രാഷ്ട്രീയത്തിന്റെ അടുത്ത അധ്യായം തീരുമാനിക്കുന്നത് തിരഞ്ഞെടുപ്പ് ഫലങ്ങൾ മാത്രമല്ല; സർക്കാർ നയങ്ങൾ യഥാർത്ഥത്തിൽ ജനങ്ങളിലെത്തുന്നുണ്ടോ എന്നതാണ്.

 സോഷ്യൽ മീഡിയയുടെ കാലമാണ്  സർക്കാരിന് ദുർബലപ്പെടുത്താൻ ശ്രമിക്കുന്ന ഏത് ശക്തിയായാലും അതിനെ നേരിടാൻ ജനാധിപത്യത്തിൽ  ജനങ്ങൾക്ക് ശക്തിയുണ്ട്, അതുകൊണ്ടുതന്നെ പ്രതീക്ഷയോടെ അടുത്ത അഞ്ചുവർഷം കേരളത്തിലെ ജനങ്ങൾ ഈ സർക്കാരിനെ ഉറ്റുനോക്കുന്നു