വിദ്യാർത്ഥി നേതാക്കന്മാർക്ക് വേണ്ടി ചട്ടവിരുദ്ധമായി എന്തും ചെയ്യാം...

“നിയമം എല്ലാവർക്കും ഒരുപോലെയാണോ?” വിദ്യാർത്ഥി നേതാക്കന്മാർക്ക് ഹാജരായി ഇല്ലെങ്കിലും പരീക്ഷ എഴുതിയില്ലെങ്കിലും കുഴപ്പമില്ല.

കേരളത്തിലെ വിദ്യാഭ്യാസ രംഗം ഇപ്പോൾ ചോദിക്കുന്ന ഏറ്റവും വലിയ ചോദ്യമാണിത്.

മുൻ എസ്‌എഫ്‌ഐ സംസ്ഥാന സെക്രട്ടറി പി.എം. ആർഷോയ്ക്ക് മഹാരാജാസ് കോളജിൽ നൽകിയ പി.ജി പ്രവേശനം ചട്ടവിരുദ്ധമായിരുന്നുവെന്ന് എംജി സർവകലാശാല തന്നെ ഔദ്യോഗികമായി സമ്മതിച്ചിരിക്കുകയാണ്. വർഷങ്ങളായി വിവാദമായിരുന്ന വിഷയത്തിൽ ഇപ്പോൾ സർവകലാശാലയുടെ തന്നെ കുറ്റസമ്മതം പുറത്തുവന്നതോടെ, കേരളത്തിലെ ഉന്നത വിദ്യാഭ്യാസ സംവിധാനത്തിന്റെ വിശ്വാസ്യത തന്നെ ചോദ്യം ചെയ്യപ്പെടുകയാണ്.

ഒരു സാധാരണ വിദ്യാർത്ഥിക്ക് 75% ഹാജർ ഇല്ലെങ്കിൽ പരീക്ഷ പോലും എഴുതാൻ കഴിയാത്ത സംസ്ഥാനമാണിത്. ഒരു ദിവസം ഹാജർ കുറവുണ്ടായാലും വിദ്യാർത്ഥികളെ തടയുന്ന കോളജുകളാണ് കേരളത്തിൽ ഉള്ളത്. എന്നാൽ ഇപ്പോൾ പുറത്തുവന്ന വിവരങ്ങൾ പ്രകാരം ആർഷോയ്ക്ക് ആറാം സെമസ്റ്ററിൽ ഉണ്ടായിരുന്നത് വെറും 10% ഹാജർ മാത്രമായിരുന്നു. എന്നിട്ടും പി.ജി പ്രവേശനം ലഭിച്ചു. ഇത് എങ്ങനെയാണ് സാധ്യമായത്? ഇതിന് ആര് ഉത്തരവാദി ആണ്.

കോളജ് അധികൃതർ നൽകിയ വിശദീകരണം അതിലും അതിശയകരമാണ്. വിദ്യാർത്ഥി യൂണിയൻ പ്രവർത്തനങ്ങളുടെ പേരിൽ 27 ദിവസത്തെ ഹാജർ ഇളവ് നൽകിയെന്നാണ് പറഞ്ഞത്. പക്ഷേ സർവകലാശാല ചട്ടം വ്യക്തമാക്കുന്നത് പരമാവധി 15 ദിവസത്തെ ഇളവ് മാത്രമാണ് അനുവദനീയമെന്നതാണ്. അതായത് ചട്ടം ലംഘിച്ചാണ് അധിക ഇളവ് നൽകിയതെന്ന് ഇപ്പോൾ വ്യക്തമാണ്.

ഇവിടെ ചോദിക്കേണ്ട ഒരു പ്രധാന ചോദ്യം ഉണ്ട് —

ഒരു സാധാരണ വിദ്യാർത്ഥിക്കായിരുന്നെങ്കിൽ ഇതേ ഇളവ് ലഭിക്കുമായിരുന്നോ? ഇതൊക്കെ ചോദ്യം ചെയ്യപ്പെടുമ്പോൾ ഓരോരോ ന്യായങ്ങളുമായി ഇവരുടെ നേതാക്കന്മാർ മുന്നിട്ടു വരും.

കേരളത്തിലെ ആയിരക്കണക്കിന് വിദ്യാർത്ഥികൾ ഓരോ ദിവസവും ക്ലാസിൽ കൃത്യമായി ഹാജരാകാൻ പരിശ്രമിക്കുന്നു. പലർക്കും കുടുംബ പ്രശ്നങ്ങൾ ഉണ്ടാകും, സാമ്പത്തിക ബുദ്ധിമുട്ടുകൾ ഉണ്ടാകും, യാത്രാ പ്രശ്നങ്ങൾ ഉണ്ടാകും. എന്നിട്ടും നിയമം പറഞ്ഞ് അവരെ പരീക്ഷയിൽ നിന്ന് വിലക്കാറുണ്ട്. എന്നാൽ രാഷ്ട്രീയ ശക്തിയുള്ള ഒരാൾക്ക് മാത്രം വേറൊരു നിയമമാണോ?

റിപ്പോർട്ടുകൾ പ്രകാരം മഹാരാജാസ് കോളജ് പ്രിൻസിപ്പൽ സർവകലാശാലയെ തെറ്റിദ്ധരിപ്പിച്ചുവെന്ന ഗുരുതര ആരോപണവും ഉയർന്നിട്ടുണ്ട്. ആദ്യ റിപ്പോർട്ടിൽ തെറ്റായ വിവരങ്ങൾ നൽകിയതായി സിൻഡിക്കറ്റിൽ ചർച്ചയായതായാണ് വിവരം. ഇത് ഒരു വ്യക്തിയുടെ അഡ്മിഷൻ പ്രശ്നം മാത്രമല്ല, വിദ്യാഭ്യാസ സ്ഥാപനങ്ങളുടെ വിശ്വാസ്യതയെ തന്നെ ബാധിക്കുന്ന വിഷയമാണ്. ഇതൊക്കെ ചോദിക്കുന്ന അധ്യാപകരെ തെറിവിലിട്ട് ആക്രമിക്കും.

ഇത്രയും ഗുരുതരമായ ചട്ടലംഘനം കണ്ടെത്തിയിട്ടും ഒടുവിൽ ഉണ്ടായ നടപടി എന്താണ്?

“ജാഗ്രതക്കുറവ്” ഓർമ്മിപ്പിക്കൽ മാത്രം!

ഇവിടെയാണ് ജനങ്ങളുടെ സംശയം കൂടുതൽ ശക്തമാകുന്നത്. സാധാരണ വിദ്യാർത്ഥികൾക്ക് കടുത്ത നിയമം, രാഷ്ട്രീയ ബന്ധമുള്ളവർക്ക് മൃദുവായ സമീപനം — ഇതാണ് കേരളത്തിലെ പുതിയ വിദ്യാഭ്യാസ നീതിയോ?

വിദ്യാർത്ഥി രാഷ്ട്രീയം കേരളത്തിന്റെ ഭാഗമാണ്. അത് ആവശ്യമുള്ളതുമാണ്. പക്ഷേ വിദ്യാർത്ഥി രാഷ്ട്രീയം വിദ്യാഭ്യാസ ചട്ടങ്ങൾ മറികടക്കാനുള്ള ലൈസൻസ് അല്ല. സർവകലാശാലകൾ രാഷ്ട്രീയ പാർട്ടികളുടെ താൽപര്യങ്ങൾക്ക് വേണ്ടി നിയമം മാറ്റിത്തീർക്കുന്ന ഇടങ്ങളായി മാറിയാൽ ഏറ്റവും കൂടുതൽ നഷ്ടമാകുന്നത് സാധാരണ വിദ്യാർത്ഥികൾക്കായിരിക്കും.

ഈ വിഷയത്തിൽ ഏറ്റവും പ്രധാനമായി വേണ്ടത് സുതാര്യമായ അന്വേഷണം കൂടിയാണ്. ആരാണ് തെറ്റു ചെയ്തത്? ആരാണ് നിയമം മറികടന്നത്? ആരാണ് തെറ്റായ റിപ്പോർട്ട് നൽകിയത്? എന്തുകൊണ്ടാണ് ശക്തമായ നടപടി ഉണ്ടായില്ല? ഈ ചോദ്യങ്ങൾക്ക് വ്യക്തമായ മറുപടി കേരളം അർഹിക്കുന്നു.

ഇന്ന് ആർഷോയുടെ പേരിൽ വിവാദമാകുന്ന ഈ വിഷയം നാളെ മറ്റാരുടെയെങ്കിലും കാര്യത്തിൽ ആവർത്തിക്കാതിരിക്കാൻ ശക്തമായ നടപടിയും വിദ്യാഭ്യാസ രംഗത്ത് രാഷ്ട്രീയ സ്വാധീനത്തിനെതിരായ വ്യക്തമായ നിലപാടും അനിവാര്യമാണ്.

നിയമം എല്ലാവർക്കും ഒരുപോലെ ബാധകമാകുന്ന ദിവസം മാത്രമേ വിദ്യാഭ്യാസ സ്ഥാപനങ്ങളിലേക്കുള്ള ജനങ്ങളുടെ വിശ്വാസം തിരികെ വരൂ. ഓരോ പാർട്ടികൾ അധികാരത്തിൽ വരുമ്പോഴും വിദ്യാഭ്യാസരം വീണ്ടും വീണ്ടും തകർന്നു കൊണ്ടിരിക്കുകയാണ്.

 കഷ്ടപ്പെട്ട് പഠിക്കുന്ന കുട്ടികളുടെ കാര്യം കട്ടപ്പൊക...